Tesla jáne SpaceX kompanıalarynyń bas atqarýshy dırektory, álemniń jetinishi baı adamy Ilon Mask Qytaı ekonomıkasy Amerıka Qurama Shtattarynan kem degende eki nemese úsh ese asyp ketetinin málimdedi. Bul týraly Qamshy tilshisi amerıkalyq CNBC telearnasyna silteme jasap habarlaıdy.

– Sizderge birtúrli bolyp kórinetin nárse – Qytaı ekonomıkasy AQSH ekonomıkasynan keminde eki ese, múmkin, úsh ese asyp ketýi múmkin. Soǵys negizi – ekonomıka... Eger siz jańashyl bolmasańyz, siz jeńilesiz, – dedi Ilon Mask AQSH áskerı-áýe kúshteriniń general-leıtenanty Djon Tompsonmen bolǵan suhbatta.

AQSH pen Qytaı ekonomıkasy qazirdiń ózinde álemdegi eń iri ekonomıka. Nasdaq málimeti boıynsha, AQSH-tyń jalpy ishki ónimi (JİÓ) 21,44 trıllıon dollardy quraıdy jáne álemdik ekonomıkanyń tórtten birine ıe. Al Qytaı JİÓ 14,14 trıllıon dollarǵa teń, ári Qytaı ekonomıkasy eń jyldam damyp kele jatqan trıllıon dollarlyq ekonomıka.

Qytaı halqy amerıkalyqtardan shamamen tórt ese kóp bolǵandyqtan, Mask Beıjińniń ekonomıkalyq turǵydan Vashıngtonnan asyp ketýi múmkin ekenin aıtty. AQSH sanaǵy boıynsha, Qurama Shtattarda shamamen 330 mıllıon adam tursa, Qytaı halqynyń sany 1,3 mıllıard adamnan asady.

– Tek (Qytaıdyń) jan basyna shaqqandaǵy tabysy bizdikiniń jartymsyna jetse, olar AQSH ekonomıkasynan eki ese asyp ketedi, – dedi Mask.

Tompsonmen áńgimelesý barysynda Mask básekege qabilettilikti saqtaý úshin AQSH-taǵy ınovasıanyń mańyzyn birneshe ret atap ótti. Ǵarysh salasyna kelgende Mask Amerıkanyń artta qalý qaýpi bar ekenin aıtty.

– Bul buryn úlken qaýip emes bolsa, qaıta qazir qaýip... Eger Qurama Shtattar ǵaryshtyq ınovasıany damytpasa, onda ǵaryshta ekinshi oryn alatynyna meniń kúmánim joq, – dedi teh-mıllıarder. 

Jaqynda Ilon Maskt qalaı álemniń jetinshi baı adamy bolǵany jarıalanǵan.

Sonymen birge, Mask ǵarysh kompanıasyna 37 mıllıard dollar ınvestısıa salyp, 30 mamyrda SpaceX kompanıasy eki ǵaryshkerdi Halyqaralyq ǵarysh stansıasyna jibergen. Ol kún "Amerıkalyq ǵaryshtyq baǵdarlamanyń jańa dáýiri bastalǵan kún" dep sıpattalǵan. Óıtkeni NASA ǵaryshkerleri AQSH topyraǵynda 2011 jyldan beri ǵaryshqa ushpaǵan. 2011 jyldan bastap olar ǵaryshqa Baıqońyrdan ushyp kelgen. Ushyrylym sátti bolǵannan keıin, ǵarysh kemesiniń Qazaqstannan ótken sátiniń vıdeosy jarıalanǵan.